ខេត្តស្វាយរៀង ៖ មានករណីអគ្គិភ័យឆាបឆេះបន្ទប់ នៃអាគារជាន់ទី០៦ ក្នុងបរិវេណក្រុមហ៊ុនកាស៊ីណូ វីននឺផាក ឆេះយ៉ាងសន្ធោសន្ធៅបង្កឲ្យមានការភ្ញាក់ផ្អើលដល់ប្រជាពលរដ្ឋយ៉ាងខ្លាំង ។
ករណីអគ្គិភ័យនេះ កើតឡើងនៅវេលាម៉ោង០២និង១៤នាទីរសៀល ថ្ងៃទី៥ ខែធ្នូ ឆ្នាំ២០២៤ នៅចំណុចបន្ទប់អាគារ D5 ជាន់ទី៦ នៃបរិវេណក្រុមហ៊ុនកាស៊ីណូ វីននឺផាក ដែលគេសង្ស័យបង្កប់ល្បែងអនឡាញដោយខុសច្បាប់ ស្ថិតនៅភូមិបាវិតកណ្តាល សង្កាត់បាវិតក្រុងបាវិត ។
ក្រោយអគ្គិភ័យបានឆាបឆេះ ប្រជាពលរដ្ឋបានរាយការណ៍ជូនដល់សមត្ថកិច្ចក្រុងបាវិត កម្លាំងសមត្ថកិច្ចបានចេញរថយន្តទៅអន្តរាគមន៍ ភ្លាមៗផងដែរ ដោយប្រើប្រាស់រថយន្តពន្លត់អគ្គិភ័យ នៃអធិការដ្ឋាននគបាលក្រុងបាវិត ចំនួន០២គ្រឿង ទៅជួយអន្តរាគមន៍។ រហូតមកដល់ម៉ោង២និង៣២នាទីរសៀលថ្ងៃដដែល ភ្លើងមិនទាន់រលត់នៅឡើយទេ កម្លាំងសមត្ថកិច្ចកំពុងអន្តរាគមន៍បន្ថែមទៀត ។
ទាក់ទិនករណីនេះដែរ អ្នកសារព័ត៌មានយើង មិនអាចចូលទៅថតយករូបភាពបានទេ ដោយសារមានសន្តិសុខកាស៊ីណូហាមឃាត់មិនឲ្យអ្នកសារព័ត៌មានយើង ចូលទៅទេ ដូច្នេះថតយករូបភាពពីចម្ងាយ (អគារដែលឆេះនេះ ជាតំបន់ហាមឃាត់ ទើបមានការសង្ស័យថា! ÷ ជាអគារបើកល្បែងអនឡាញខុសច្បាប់) ព្រោះមានសន្តិសុខយាមកាម យ៉ាងតឹងរ៉ឹង ។
ដោយឡែក លោកអធិការនគបាលក្រុងបាវិត បានឲ្យដឹងថា÷ ករណីអគ្គិភ័យនេះ សមត្ថកិច្ចប្រើប្រាស់រថយន្តពន្លត់អគ្គិភ័យ០៧គ្រឿង ប្រើប្រាស់ទឹកអស់០៥គ្រឿង ទើបគ្រប់គ្រងបាន ។
ប្រភពបន្តថា÷ ការចុះអន្តរាគមន៍ រួមមានកម្លាំងបញ្ជាការដ្ឋានកងរាជអាវុធហត្ថខេត្តស្វាយរៀង និងកម្លាំងមូលដ្ឋានកងរាជអាវុធហត្ថក្រុងបាវិត សហការជាមួយកម្លាំងអធិការដ្ឋាននគរបាលក្រុងបាវិត ដឹកនាំដោយលោកវរសេនីយ៍ត្រី គ្រុយ សុខឡេង មេបញ្ជាការមូលដ្ឋានកងរាជអាវុធហត្ថក្រុងបាវិត បានចុះអន្ដរាគមន៍ជួយពន្លត់ករណីអគ្គិភ័យ នៅចំណុចអគារ D5 ជាន់ទី៦ ក្នុងបរិវេណក្រុមហ៊ុនកាស៊ីណូ វីននឺសផាក ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
ប្រភពបន្តទៀតថា÷ រថយន្តពន្លត់អគ្គិភ័យចំនួន០៧គ្រឿង ប្រើប្រាស់ទឹកអស់០៥រថយន្ត រថយន្តបញ្ជាការដ្ឋានកងរាជអាវុធហត្ថខេត្តស្វាយរៀងចំនួន០៣គ្រឿង, រថយន្ដមូលដ្ឋានកងរាជអាវុធហត្ថក្រុងបាវិតចំនួន០១គ្រឿង និងរថយន្តរបស់អធិការដ្ឋាននគរបាលក្រុងបាវិត ចំនួន០២គ្រឿង និងរថយន្តពន្លត់អគ្គីភ័យរបស់ក្រុមហ៊ុនបាវិត«ដាយអឺមេនកាស៊ីណូ» និងហូថែល ចំនួន០១គ្រឿង។ រហូតមកដល់វេលាម៉ោង៣និង៥០នាទីរសៀលនេះ សមត្ថកិច្ចបានគ្រប់គ្រងបាន១០០%ហើយ ។
ចំពោះមូលហេតុបង្កឲ្យមានអគ្គិភ័យនេះ សមត្ថកិច្ចជំនាញ កំពុងស្រាវជ្រាវ ។
យ៉ាងណាអគ្គិភ័យនេះដែរ មិនបណ្តាលឱ្យមានមនុស្សរងរបួស ឫស្លា.ប់នោះទេ គ្រាន់តែខូចខាតសម្ភារៈ ដូចជា តុ កៅអី និងសម្ភារៈប្រើប្រាស់នៅក្នុងបន្ទប់បាយមួយចំនួន ៕
