រាជធានីភ្នំពេញ÷ ជនសង្ស័យចំនួន១១នាក់ ដែលធ្វើសកម្មភាពលួចនិងឆក់យ៉ាងសកម្មជាច្រើនករណី នៅក្នុងរាជធានីភ្នំពេញ ត្រូវបានកម្លាំងនគរបាលការិយាល័យព្រហ្មទណ្ឌកំរិតស្រាលនៃស្នងការនគរបាលរាជធានីភ្នំពេញ និងកម្លាំងនគរបាលនៃអធិការដ្ឋានខណ្ឌចំការមន ឃាត់ខ្លួនហើយ ដោយយកមកបង្ហាញមុខជាសាធារណៈរួមគ្នា កាលពីព្រឹកថ្ងៃទី០១ ខែធ្នូ ឆ្នាំ២០២៤នេះ ។
លោកវរសេនីយ៍ឯក ម៉ម សាវន ប្រធានការិយាល័យព្រហ្មទណ្ឌ កំរិតស្រាល នៃស្នងការដ្ឋាននគរបាលរាជធានីភ្នំពេញបានអោយដឹងថា÷ ដោយមានបទបញ្ជាពីឯកឧត្តមឧត្តមសេនីយ៍ឯក ជួន ណារិន្ទអគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ប៊ុន សត្យាស្នងការរងនគបាលរាជធានីភ្នំពេញទទួលផែននគរបាលព្រហ្មទណ្ឌ កម្លាំងនគរបាល ការិយាល័យព្រហ្មទណ្ឌកំរិតស្រាល បានធ្វើការស្រាវជ្រាវឃាត់ខ្លួនជនសង្ស័យជាបន្តបន្ទាប់បានចំនួន ៨នាក់ហើយ អធិការដ្ឋានខណ្ឌចំការមនឃាត់ខ្លួនបានចំនួន៣នាក់សរុបទាំងអស់១១នាក់ ដែលត្រូវបង្ហាញមុខនៅពេលនេះ ។
លោកវរសេនីយ៍ឯក ម៉ម សាវន បានអោយដឹងទៀតថា÷ នៅថ្ងៃទី២៩ និងថ្ងៃទី៣០ ខែវិច្ឆិកា ឆ្នាំ២០២៤នេះ ការិយាល័យនគរបាលព្រហ្មទណ្ឌកំរិតស្រាលឃាត់ខ្លួនជន សង្ស័យសរុបចំនួនចំនួន០៥នាក់(ស្រី០១) និងចាប់យកវត្ថុតាង ពាក់ព័ន្ធបទល្មើសអំពើលួច (លួចម៉ូតូ) ចំនួន ០២ ករណី៖ករណីទី១ លួចម៉ូតូម៉ាកហុងដាសេ១២៥ ពណ៌ ខ្មៅ សេរីឆ្នាំ២០១៧ ពាក់កផ្លាកេលខត្បូងឃ្មុំ ១D-៩៧២៣ មិនបានសម្រេចនៅប្រព្រឹត្តនៅក្រោយផ្ទះលេខA៣១ ភូមិ១ សង្កាត់ស្រះចក ខណ្ឌដូនពេញ រាជធានីភ្នំពេញ កាល ពីថ្ងៃទី២៨ ខែវិច្ឆិកា ឆ្នាំ២០២៤ ,ករណីទី២ អំពើលួចយកម៉ូតូម៉ាកហុងដាសេ១២៥ ពណ៌ ខ្មៅ សេរីឆ្នាំ២០១៧ ពាក់ផ្លាកលេខ ភ្នំពេញ១GK ៩៦៥៨ ប្រព្រឹត្តនៅចំណុចផ្លូវបេតុង ភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ កាលពីថ្ងៃទី២៩ ខែវិច្ឆិកា ឆ្នាំ២០២៤ ។
ដោយឡែកជនសង្ស័យចំនួន៣នាក់ទៀតត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាលឃាត់ខ្លួន កាលពីវេលាយប់ថ្ងៃទី២៩ ខែវិច្ឆិកា ឆ្នាំ២០២៤ នៅចំណុចផ្ទះសំណាក់លី ហួរ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ពីបទ«លួចមានស្ថានទម្ងន់ទោស»(ឆក់យកទ្រព្យសម្បត្តិប្រជាពលរដ្ឋ)ចំនួន០៤ករណី ដែលរួមមាន÷
*ករណីទី១÷ អំពើលួចមានស្ថានទម្ងន់ទោសដោយសារការប្រព្រឹត្តអំពើហិ.ង្សា (ឆក់យកទូរសព្ទ័ដៃមិនបានសម្រេច) ប្រព្រឹត្តនៅចំណុចមុខសណ្ឋាគារឈុនហួយ ផ្លូវលេខ១១៣K ភូមិក្បាលដំរី២ សង្កាត់កាកាប២ ខណ្ឌពោធិសែនជ័យ រាជធានីភ្នំពេញ កាលពី ថ្ងៃទី២៨ ខែវិច្ឆិកា ឆ្នាំ២០២៤ ។
*ករណីទី២÷ អំពើលួចមានស្ថានទម្ងន់ទោសដោយសារការប្រព្រឹត្តអំពើហិ.ង្សា (ឆក់យកទូរសព្ទ័ដៃមិនបានសម្រេច) នៅចំណុចទល់មុខកន្លែងជួសជុលម៉ូតូ ផ្លូវលេខ១១៣K ភូមិព្រៃទា១ សង្កាត់ចោមចៅ៣ កាលពីថ្ងៃទី២៨ ខែវិច្ឆិកា ឆ្នាំ២០២៤ ។
*ករណីទី៣÷ ឆក់យកទូរស័ព្ទដៃប្រព្រឹត្តនៅចំណុច ផ្លូវបេតុង ភូមិក្បាលដំរី២ សង្កាត់កាកាប២ ខណ្ឌពោធិសែនជ័យ រាជធានីភ្នំពេញកាលពីថ្ងៃទី២៥ ខែវិច្ឆិកា ឆ្នាំ ២០២៤។
*និងករណីទី៤÷ ឆក់ទូរសព្ទពីជនជាតិចិនប្រព្រឹត្តនៅចំណុចផ្លូវសហព័ន្ធរុស្សី ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីថ្ងៃទី២៦ ខែវិច្ឆិកា ឆ្នាំ២០២៤ ។
រីឯជនសង្ស័យ៣នាក់ទៀតធ្វើសកម្មភាពឆក់យ៉ាងសកម្មត្រូវបានកម្លាំងនគរបាលនៃអធិការដ្ឋានខណ្ឌចំការមន ឃាត់ខ្លួនហើយ
យកមកបង្ហាញមុខជាសាធារណៈរួមគ្នាតែម្ដង ដោយសរុបទាំងអស់ចំនួន ១១នាក់៕
