រាជធានីភ្នំពេញ÷ មេតុងទីន២នាក់ប្ដីប្រពន្ធ បានវេចទាំងប្រាក់តុងទីននិងប្រាក់កម្ចីបន្ថែមពីកូនតុងទីនសរុបជាង១៣ម៉ឺនដុល្លារគេចខ្លួនមិនទទួលខុសត្រូវជាង១ឆ្នាំកន្លងមកហើយ ពេលនេះស្រាប់តែឃើញជនសង្ស័យជាប្ដីចូលផ្ទះ ។ ក៏ត្រូវបានម្ចាស់បំណុលនិងជាកូនតុងទីន ធ្វើការឃាត់ខ្លួនប្រគល់ឲ្យនគរបាលប៉ុស្តិ៍ចោមចៅទី៣ ធ្វើការសាកសួរនិងកសាងសំណុំរឿងចាត់ការតាមច្បាប់លើសំណុំរឿងរំលោភលើទំនុកចិត្តនេះតែម្ដង ។
ការឃាត់ខ្លួននោះបានធ្វើឡើង កាលពីវេលាម៉ោង១១និង៣០នាទីព្រឹកថ្ងៃទី០៦ ខែធ្នូ ឆ្នាំ២០២៤ នៅក្នុងផ្ទះរបស់ជនសង្ស័យស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យជាប្ដីដែលត្រូវម្ចាស់បំណុលនិងជាកូនតុងទីនឃាត់ខ្លួនប្រគល់ឲ្យនគរបាលនោះឈ្មោះ អឹម ផារ៉ុង អាយុ៣៧ ឆ្នាំ ចំណែកស្រ្តីជាប្រពន្ធកំពុងបន្តរត់គេចខ្លួននៅឡើយ ហើយត្រូវបានស្គាល់ឈ្មោះ មី អេងលី អាយុ២៣ឆ្នាំ អ្នកទាំង២មានមុខរបរមេតុនទីន និងទីលំនៅក្នុងភូមិកើតហេតុខាងលើ ។
ដោយឡែកជនរងគ្រោះដែលចាញ់បោកជនសង្ស័យទាំងពីរនាក់ខាងលើនោះទី១. ឈ្មោះ អេង ស៊ីណាត ភេទស្រី អាយុ៣១ឆ្នាំ មុខរបរលក់ដូរ និងទី២. ឈ្មោះ ឃន់ សុចាន់ ភេទស្រី អាយុ៤១ឆ្នាំ មុខរបរមេផ្ទះ ហើយអ្នកទាំង២នាក់នេះមានទីលំនៅ ក្នុងភូមិកើតហេតុជាមួយជនសង្ស័យដែរ ។ ពួកគាត់បានបាត់បង់ប្រាក់ទាំងក្នុងការលេងតុងទីនផង និងឲ្យជនសង្ស័យខ្ចីផងសរុបចំនួន១៣៨,៣១៥$ (ដប់បីម៉ឺនប្រាំបីពាន់បីរយដប់ប្រាំដុល្លារអាមេរិក) ។
សមត្ថកិច្ចប៉ុស្តិ៍ចោមចៅទី៣បានឲ្យដឹងថា÷ សកម្មភាពរំលោភលើទំនុកចិត្ត(ឆបោក)នោះបានកើតឡើងតាំងពីថ្ងៃទី៣០ ខែមិថុនា ឆ្នាំ២០២៣ វេលាម៉ោង១០និង៣០នាទីព្រឹកមកម្ល៉េះ បើគិតរហូតមកដល់ពេលនេះមានរយៈពេលជាង១ឆ្នាំកន្លងមកហើយ ។ ដោយពេលនោះជនសង្ស័យនិងប្រពន្ធខាងលើគឺជាមេតុនទីនបានបបួលជនរងគ្រោះឲ្យលេងតុងទីនជាមួយខ្លួន ព្រមទាំងបានខ្ចីលុយបន្ថែមពីជនរងគ្រោះចំនួនជាង១៣ម៉ឺនដុល្លារនោះ បន្ទាប់មកក៏បានគេចវេសមិនទទួលខុសត្រូវឡើយ ។
ប្រភពដដែលបានប្រាប់ឲ្យដឹងបន្តទៀតថា÷ រហូតដល់ថ្ងៃទី០៦ ខែធ្នូ ឆ្នាំ២០២៤ ជនរងគ្រោះទាំង២នាក់បានប្រទះឃើញជនសង្ស័យឈ្មោះ ធីម ផារ៉ុងដែលជាប្តីកំពុងនៅក្នុងផ្ទះ ខណៈនោះក៏បានធ្វើការឃាត់ខ្លួន ។ បន្ទាប់មកបាននាំយមកប្រគល់ឲ្យប៉ុស្តិ៍នគរបាលរដ្ឋបាលចោមចៅទី៣ ដើម្បីធ្វើការសាកសួរនិងចាត់ការតាមច្បាប់តែម្តង ចំណែកជនសង្ស័យឈ្មោះមី អេងលី ដែលជាប្រពន្ធមិនឃើញនៅផ្ទះនោះទេ ដោយកំពុងបន្តរត់គេចខ្លួន ៕
