លោក តាន់ គឹមសួរ បានរកឃើញ "ក្រុមហ៊ុនសុវណ្ណភូមិ" របស់ លោកឧកញ៉ា អាន ម៉ាឌី នៅខេត្តព្រះវិហារ បំពានលក្ខខណ្ឌដែលរដ្ឋាភិបាលបានដាក់ជូនស្ទើរតែទាំងស្រុង

ខេត្តព្រះវិហារ ÷ យោងតាមគណនេយ្យហ្វេសប៊ុកផេក ផ្លូវការរបស់ លោក តាន់ គឹមសួរ បានលេីកលេីងថា÷ «ខ្ញុំបានរកឃើញថាក្រុមហ៊ុនសុវណ្ណភូមិរបស់ លោកឧកញ៉ា អាន ម៉ាឌី នៅខេត្តព្រះវិហារ បានបំពាននូវលក្ខខណ្ឌដែលរដ្ឋបានដាក់ជូនស្ទើរតែទាំងស្រុង (ខ្ញុំហ៊ាននិយាយ ខ្ញុំហ៊ានទទួលខុសត្រូវលើសម្ដីរបស់ខ្ញុំចំពោះមុខច្បាប់)»។

លោក តាន់ គឹមសួរ បានបន្តទៀតថា÷ នៅថ្ងៃទី ២៨ ខែធ្នូ ឆ្នាំ ២០២៤ ខ្ញុំ បាទចុះទៅជាមួយមន្ត្រីជំនាញរដ្ឋបាលព្រៃឈើថ្នាក់ជាតិ សហការជាមួយមន្ទីរបរិស្ថាន និងមន្ទីរកសិកម្ម រុក្ខា ប្រមាញ់ និងនេសាទ ចុះទៅដល់ក្រុមហ៊ុនសុវណ្ណភូមិ នេះផ្ទាល់ ហើយបានសង្កេតឃើញថា÷ ក្រុម ហ៊ុនមិនបានអនុវត្តតាមគោលការណ៍ដែលក្រសួងបានដាក់ ឲ្យ៖

១/. មុនចាប់ផ្ដើមដំណើរការឈូសឆាយ ក្រុមហ៊ុនមិន បានសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ដើម្បីធ្វើការកំណត់នូវតំបន់ឈូសឆាយ។

២/. ក្រុមហ៊ុនបានធ្វើការឈូសឆាយប៉ះនូវតំបន់ទ្រនាប់ដងអូរដែលក្រសួងមានការហាមប្រាមជាដាច់ខាត។

៣/. ឈូសបំផ្លាញដីព្រៃរក្សាទុករបស់រដ្ឋអស់ជាច្រើនហិកតា។

៤/. មិនមានបិទlogo លើគ្រឿងចក្រ-យានយន្ត និងមិន បានអនុវត្តតាមវិធានបច្ចេកទេសជាធរមាន ដោយមានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ ធ្វើ ការតាមដានលើដំណើរការឈូសឆាយរបស់ក្រុមហ៊ុន។

៥/. មិនបានធ្វើការឈូសឆាយក្នុងមួយអនុតំបន់ម្ដង ហើយធ្វើការដាំដុះភ្លាមតាមលក្ខខណ្ឌដែលក្រសួងបានដាក់ឲ្យនោះទេ។

ខ្ញុំសង្ឃឹមយ៉ាងមុតមាំថា រដ្ឋាភិបាលនឹងមិនមានការយោគយល់ចំពោះទង្វើត្រីងៀតឆ្លៀតពង ឬដូចប្រសាសន៍របស់សម្ដេចធិបតីនាយករដ្ធមន្ត្រីបានលើកឡើងថាកន្ទេលធំបន្លំដេក នេះជាដាច់ខាត។

ខ្ញុំគិតថា បើរដ្ឋាភិបាលមិនមានវិធានការសមស្របណា មួយទៅលើក្រុមហ៊ុនទាំងឡាយណាដែលមានការឈូសបំពានទៅលើដីព្រៃរដ្ឋ (បំផ្លាញធនធានធម្មជាតិយ៉ាងសន្ធឹកសន្ធាប់) និងមិនគោរពតាមលក្ខខណ្ឌដែលរដ្ឋដាក់ឲ្យទេ មហាជននឹងមិនមានការសប្បាយចិត្តទេ ដោយគិតថានេះគឺជារឿងដែលអយុត្តិធម៌បំផុតដែលប្រជាជនធម្មតាប្រព្រឹត្តិបទល្មើសព្រៃឈើបន្តិចបន្តួច មានការដាក់ទោសចាប់ចងដោយមិនមានការលើកលែង រីឯក្រុមហ៊ុនឈូសបំពានរាប់រយហិកតាបែរជាមិនមានចំណាត់ការអ្វីទៅវិញ ឬមានចំណាត់ការដែរ តែចំណាត់ ការដែលមានការយោគយល់ទៅវិញ។ ហើយករណីត្រីងៀតឆ្លៀតពង ឬកន្ទេលធំបន្លំដេកនឹងកើតមានឡើងជាបន្តបន្ទាប់។

ខ្ញុំសង្ឃឹមយ៉ាងមុតមាំថារដ្ឋាភិបាលនឹងមិនមានការយោគយល់ចំពោះទង្វើត្រីងៀតឆ្លៀតពង ឬដូចប្រសាសន៍របស់សម្ដេចធិបតីនាយករដ្ធមន្ត្រីបានលើកឡើងថា “កន្ទេលធំបន្លំដេក” នេះជាដាច់ខាត៕

ដកស្រង់ប្រភពព័ត៌មានពី ទំព័រហ្វេសប៊ុករបស់ លោក តាន់ គឹមសួរ ទាំងស្រុង