អុញនោះ! ឱសថស្ថាន "រស្មីអូឡាំពិកថ្មី" ប្រឈមទៅនឹងការដកអាជ្ញាប័ណ្ណ បន្ទាប់ពីលួចកែកាលបរិច្ឆេទ

CRT News

រាជធានីភ្នំពេញ÷ មន្ទីរសុខាភិបាលរាជធានីភ្នំពេញ កំពុងចាត់ការតាមច្បាប់លើករណី ឱសថស្ថាន"រស្មីអូឡាំពិកថ្មី" ដែលលក់ឱសថមានការកែប្រែកាលបរិច្ឆេទប្រើប្រាស់ ដោយបានកែប្រែកាលបរិច្ឆេទពីខែ/ឆ្នាំ ០១/២០២៥ មក ០១/២០២៦។ 


ការប្រកាសចាត់វិធានការនេះ បន្ទាប់ពីមានការផ្សព្វផ្សាយ និងចែកចាយលើបណ្តាញសង្គម ហើយបន្ទាប់ពីដឹងកំហុស ម្ចាស់ឱសថស្ថាននេះ បានរុះរើស្លាកយីហោឱសថស្ថានដោយខ្លួនឯង តែទោះយ៉ានេះក៏ដោយ វិធានការច្បាប់នៅតែបន្តអនុវត្តន៍។


សូមរំលឹកថា÷ ក្រោយផ្ទុះឡើងនូវករណីម្ចាស់ឱសថស្ថាន " រស្មីអូឡាំពិកថ្មី" លក់ថ្នាំកែប្រែកាលបរិច្ឆេទឱ្យពលរដ្ឋ ដែលត្រូវបានមហាជនរិះគន់ស្ទើរទូទាំងប្រទេស ចំពោះការបំពានវិជ្ជាជីវៈជាគ្រូពេទ្យ យកជិវិតមនុស្សមកលេងសើច ពេលនេះ ប្រធានមន្ទីរសុខាភិបាលរាជធានីភ្នំពេញ បញ្ជាក់ថា÷ ភ្លាមៗម្ចាស់ឱសថស្ថាន ប្រញាប់ប្រញាល់បិទទ្វារ ទម្លាក់យីហោដោយខ្លួនឯងយ៉ាងតក់ក្រហល់ គឺហាក់ខុសប្រក្រតី។


នៅថ្ងៃទី២៥ ខែធ្នូ ឆ្នាំ២០២៤នេះ លោក ងី មានហេង ប្រធានមន្ទីរសុខាភិបាលរាជធានីភ្នំពេញ បានឱ្យដឹងថា÷ «ពាក់ព័ន្ធករណីនេះ បន្ទាប់ពីទទួលបានដំណឹង ភ្លាមៗលោកបានចាត់ឱ្យមន្ត្រីជំនាញចុះស៊ើបអង្កេតដល់ទីតាំងឱសថស្ថាន ប៉ុន្តែពេលមន្ត្រីយើងទៅដល់ ម្ចាស់ឱសថស្ថាននោះហាក់ដឹងខ្លួនមុន ហើយក៏ប្រញាប់ប្រញាល់បិទទ្វារ និងបានទម្លាក់យីហោដោយខ្លួនឯង ព្រមទាំងទៅសុំច្បាប់បិទអាជីវកម្មពីច្រកចេញចូលតែមួយភ្លាមៗតែម្ដង»។ ប៉ុន្តែទោះជាយ៉ាងណា លោកប្រធានមន្ទីរស្នើសុំមិនបង្ហាញអត្តសញ្ញាណម្ចាស់ឱសថស្ថាននេះទេ បើទោះបីជាឱសថស្ថានមួយនេះ បានសរសេរបញ្ជាក់នៅលើផ្ទាំងយីហោរបស់ខ្លួនកាលពីមិនទាន់ទម្លាក់ចេញថា÷ ជា «ឱសថការីឧត្តម ឃុន មុយហ៊ាង» យ៉ាងណាក្ដី។ លោកប្រធានមន្ទីររាជធានី បានគូសបញ្ជាក់បន្ថែមថា÷ មកទល់ពេលនេះលោកបានឯកភាពទៅលើសំណើជុំវិញការបិទឱសថស្ថានដោយខ្លួនឯង ជាស្ថាពរហើយ នឹងកំពុងបញ្ជូនរបាយការណ៍បន្តទៅកាន់អភិបាលរាជធានីភ្នំពេញ ដើម្បីធ្វើការត្រួតពិនិត្យ។


ជុំវិញការរុះរើស្លាកយីហោយ៉ាងតក់ក្រហល់នេះ មហាជនបាននិងកំពុងចោទជាសំណួរទៅកាន់មន្ត្រីជំនាញនៃក្រសួងសុខាភិបាលថា? តើ ឱសថស្ថាន "រស្មីអូឡាំពិកថ្មី" ដែលមានម្ចាស់ជា(ឱសថការីឧត្តម ឃុន មុយហ៊ាង) អាចប្រឈមមុខចំពោះផ្លូវច្បាប់ដែរឬទេ? ឬមួយការដោះស្លាកយីហោទម្លាក់ចោល ហើយរត់ទៅលុបអាជ្ញាបណ្ណធ្វើអាជីវកម្មពីច្រកចេញចូលតែមួយភ្លាមៗបែបនេះ ពិតជាអាចបញ្ចប់រឿងរ៉ាវរបស់ខ្លួនដែលបានប្រព្រឹត្តហើយមែនទេ? បើធ្វើបែបនេះហើយអាចរួចខ្លួន តើច្បាប់បង្កើតឡើងដើម្បីអ្វី? មួយវិញទៀត នេះបែកធ្លាយ !ចុះបេីករកសុីរាប់ឆ្មាំកន្លងមកនេះ តេីប្រជាពលរដ្ឋប៉ុន្មានលាននាក់ជាអ្នករងគ្រោះ ?


យ៉ាងណា ជុំវិញចម្ងល់របស់មហាជននេះ ត្រូវបានលោក ងី មានហេង ប្រធានមន្ទីរសុខាភិបាលរាជធានីភ្នំពេញ ឆ្លើយតបមកកាន់សារព័ត៌មានវិញថា÷ ចំពោះចំណាត់ការបន្តទៅលើផ្លូវច្បាប់ លោកនឹងសិក្សាជាមួយអ្នកជំនាញផ្នែកច្បាប់ ព្រមទាំងមន្ត្រីជំនាញសុខាភិបាល ដោយលទ្ធភាពក្នុងការបើកអាជីវកម្មឡើងវិញ គឺមិនអាចកើតមានឡើងឡើយ ព្រោះថា បុគ្គលនេះគឺនៅតែត្រូវស្ថិតនៅក្នុងបញ្ជីរខ្មៅរបស់ក្រសួង៕







#buttons=(យល់ព្រម, ទទួលយក!) #days=(20)

គេហទំព័ររបស់យើងប្រើCookies ដើម្បីបង្កើនបទពិសោធន៍របស់អ្នក ស្វែងយល់បន្ថែម
Accept !
To Top