ចេញផ្សាយ ថ្ងៃទី២៤ ខែធ្នូ ឆ្នាំ២០២៤
រាជធានីភ្នំពេញ៖ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ឯកឧត្តម កើត រិទ្ធ នៅរសៀលថ្ងៃអង្គារ៍នេះ បានអំពាវនាវឱ្យអ្នកសារព័ត៌មានទាំងអស់ប្រកាន់ខ្ជាប់នូវក្រមសីលធម៌វិជ្ជាជីវៈ។
ឯកឧត្តម ថា ៖ ក្នុងករណីដែលមិនអាចក្តាប់ព័ត៌មានបានគ្រប់ជ្រុងជ្រោយ សូមសាកសួរព័ត៌មានទៅអ្នកនាំពាក្យរបស់ស្ថាប័នអយ្យការ និង ស្ថាប័នតុលាការ ដើម្បីចៀសវាងការផ្សាយព័ត៌មានមិនពិត ឬព័ត៌មានដែលធ្វើអោយសាធារណជនមានការភ័ន្តច្រឡំ។
ការអំពាវនាវរបស់ ឯកឧត្តម រដ្ឋមន្ត្រីយុត្តិធម៌ បានធ្វើឡើងបន្ទាប់ពីមានហេតុការណ៍ថ្មីៗនេះពាក់ព័ន្ធនឹងអ្នកកាសែតម្នាក់ ឈ្មោះ ផាត់ ហ៊ន ហៅ ពូ ហន បានទទួលស្គាល់ជាសាធារណៈនូវកំហុសរបស់ខ្លួនក្នុងការរាយការណ៍ ជាពិសេសការប្រើប្រាស់ភាសាបង្ខូចកេរ្តិ៍ឈ្មោះស្ថាប័នតុលាការ ផ្សាយព័ត៌មាន និងធ្វើអត្ថាធិប្បាយព័ត៌មានដោយប្រើប្រាស់ពាក្យសំដីមិនសមរម្យ, ជេរប្រមាថចំពោះស្ថាប័នតុលាការ ព្រមទាំងបានផ្សាយព័ត៌មានមិនពិត ដែលបានធ្វើអោយប៉ះពាល់ធ្ងន់ធ្ងរដល់កិត្តិយសនៃស្ថាប័នតុលាការខេត្តកំពង់ចាម។
នៅថ្ងៃនេះ ឯកឧត្តម ឧបនាយករដ្ឋមន្ត្រី កើត រិទ្ធ បានទទួលសំបុត្រពី លោក ផាត់ ហ៊ន ហៅ ពូ ហន ដែលបានសម្តែងការសោកស្តាយបំផុតចំពោះទង្វើរបស់គាត់។
ឯកឧត្តម នេត្រ ភក្តា រដ្ឋមន្ត្រីក្រសួងព័ត៌មាន បានសម្របសម្រួលកិច្ចសន្ទនាជាមួយ
ឯកឧត្តម ឧបនាយករដ្ឋមន្ត្រី កើត រិទ្ធ និងថ្នាក់ដឹកនាំវិស័យយុត្តិធម៌ ដើម្បីពិភាក្សាគ្នារកដំណោះស្រាយសមស្របបញ្ចប់ករណីនេះ ដោយស្រុះស្រួលគ្នាក្រៅប្រព័ន្ធតុលាការ។
ជាលទ្ធផល បណ្ដឹងប្រឆាំងនឹងលោក ផាត់ ហ៊ន ត្រូវបានដកចេញដោយបើកផ្លូវសម្រាប់ការផ្សះផ្សា ដើម្បីលើកកម្ពស់កិច្ចសហការល្អរវាងស្ថាប័នតុលាការ និងការអនុវត្តវិជ្ជាជីវៈសារព័ត៌មាន។
រដ្ឋមន្ត្រីយុត្តិធម៌ ឯកឧត្តម កើត រិទ្ធ បានបង្ហាញដោយសង្កត់ធ្ងន់ថា «ខ្ញុំសូមអរគុណចំពោះឯកឧត្តមប្រធានសាលាដំបូងខេត្តកំពង់ចាម ដែលមានការយោគយល់ខ្ពស់យល់ព្រមដកពាក្យបណ្តឹងរបស់ខ្លួនវិញ»។
ឯកឧត្តម កើត រិទ្ធ បានលើកឡើងនូវពាក្យស្លោក ៖ «ក្រោយភ្លៀង មេឃស្រឡះ» ជាពាក្យប្រៀបធៀបសម្រាប់ភាពច្បាស់លាស់នៃទំនាក់ទំនងជាមួយអ្នកសារព័ត៌មានជាមួយវិស័យយុត្តិធម៌។ ឯកឧត្តម បានជំរុញឱ្យអ្នកសារព័ត៌មានអនុវត្តការផ្សព្វផ្សាយព័ត៌មានដោយប្រកាន់ខ្ជាប់នូវក្រមសីលធម៌វិជ្ជាជីវៈ ដែល
ឯកឧត្តម ហៅថា ៖ «ជាយន្តគាថាការពារខ្លួនដ៏សក្តិសិទ្ធិតាមផ្លូវច្បាប់»។
ជាងនេះទៅទៀត ឯកឧត្តម
កើត រិទ្ធ បានដល់អំពាវនាវដល់អ្នកនាំពាក្យនៃស្ថាប័នអយ្យការ និង តុលាការ យកចិត្តទុកដាក់ខ្ពស់ ក្នុងការសហការផ្តល់ព័ត៌មានចាំបាច់នានា ក្នុងក្របខ័ណ្ឌនៃការប្រកាន់ខ្ជាប់ក្រមសីលធម៌វិជ្ជាជីវៈក្នុងស្ថាប័ន, ការមិនធ្វើអោយប៉ះពាល់ដល់ជីវិតឯកជននៃបុគ្គលក្នុងសំណុំរឿង និងការគោរពគោលការណ៍សំងាត់នៃចំណាត់ការនីតិវិធីរបស់តុលាការ ដែលត្រូវបានការពារដោយច្បាប់ជាធរមាននៃព្រះរាជាណាចក្រកម្ពុជា៕
