ខេត្តកែប÷ ដោយមានការណែនាំ និងចង្អុលបង្ហាញពីសំណាក់លោកឧត្តមសេនីយ៍ត្រី ហ៊ត សីហា មេបញ្ជាការកងរាជអាវុធហត្តខេត្តកែប និងមានការសម្របសម្រួលនីតិវិធីពីលោក ខាន់ សុផល ព្រះរាជអាជ្ញា អមសាលាដំបូងខេត្តកែប នៅថ្ងៃទី២ ខែធ្នូ ឆ្នាំ២០២៤ លោកវរសេនីយ៍ទោ មៀច ប៊ុនថា មេបញ្ជាការរង កងរាជអាវុធហត្ថខេត្ត ដឹកនាំកម្លាំងមន្ទីរស្រាវជ្រាវ និងបង្ក្រាបបទល្មើស សហការជាមួយលោកឧត្តមសេនីយ៍ត្រី គង់ សត្ថារិន ស្នងការរង ស្នងការដ្ឋានស្រាវជ្រាវ និងបង្ក្រាបបទល្មើស កងរាជអាវុធហត្ថលើផ្ទៃប្រទេស និងកម្លាំងអាវុធហត្ថខេត្តកំពង់ចាម ខេត្តតាកែវ ខេត្តកណ្តាល និងរាជធានីភ្នំពេញ បានចុះបំបែកសំបុកក្រុមជនឆបោកយ៉ាងសកម្ម នៅតាមបណ្តារាជធានី-ខេត្ត ដោយឃាត់ខ្លួនជនសង្ស័យចំនួន ១២នាក់ (ស្រី០៥នាក់) នៅក្នុងផ្ទះសំណាក់ប៉ារ៉ាឌី ស្ថិតនៅភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ទោះជាយ៉ាងណា អត្តសញ្ញាណក្រុមជនសង្ស័យមិនទាន់ដឹងឡើយ។ បើតាមកងរាជអាវុធហត្ថខេត្តកែប បានអោយដឹងថា សម្ភារៈ ចាប់យករួមមាន÷
១. រថយន្តម៉ាក សាំយ៉ុង ពណ៌ទឹកប្រាក់ ស្លាកលេខ ភ្នំពេញ 2Q-0138 ចំនួន០១គ្រឿង។
២. ម៉ូតូម៉ាកហុងដាសេ១២៥ ពណ៌ខ្មៅ ស្លាកលេខភ្នំពេញ 1JP-0414 ចំនួន០១គ្រឿង
៣. ទូរសព្ទដៃ ចំនួន ១៣គ្រឿង
៤. ស្រាបៀ ចំនួន ៥៧ កេស
៥. បាកាស ចំនួន ២យួរ
៦. ឧបករណ៍ចាក់ភ្លេង សម្រាប់ដេញសត្វ ចំនួន០១
៧. ប្រាក់ដុល្លារ ចំនួន ៣០១ដុល្លារ និងប្រាក់រៀលចំនួន ៥០១,៥០០រៀល
៨. លោហៈធាតុ ពណ៌ក្រហម រួមមាន ៖ ខ្សែដៃ១ខ្សែ, ក្រវឹល១គូរ, ចិញ្ចៀនដាំត្បូង១វង់, បន្តោងខ្សែកស្រោបព្រះ ចំនួន១ ។
កងរាជអាវុធហត្ថខេត្តកែប បានអោយដឹងទៀតថា ÷ពាក់ព័ន្ធករណីឆបោកប្រាក់តាមរយៈការលក់ដូរទំនិញ ទៅឱ្យជនរងគ្រោះ ឈ្មោះ ឃុន សុខនី ភេទស្រី អាយុ៣៨ឆ្នាំ មុខរបរអាជីវករ រស់នៅភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប អស់ទឹកប្រាក់សរុបចំនួន ៧,២០០,០០០រៀល (ប្រាំពីរលានម្ភៃម៉ឺនរៀល) និងក្រវឹលកំប៉ុង សម្រាប់ប្តូរយករង្វាន់ ចំនួន ២៦កេស កាលពីថ្ងៃទី២៨ ខែវិច្ឆិកា ឆ្នាំ២០២៤ កន្លងមក ។
កងរាជអាវុធហត្ថខេត្តកែប បញ្ជាក់ថា ÷តាមការស្ដាប់ចម្លើយរបស់ជនសង្ស័យទាំងអស់ បានសារភាពថា ក្រុមរបស់ខ្លួន ពិតជាបានដើរឆបោក តាមរយៈការលក់ទំនិញនៅតាមបណ្ដារាជធានី-ខេត្ត មួយចំនួន ពិតប្រាកដមែន ។
បច្ចុប្បន្ន ក្រុមជនសង្ស័យ និងវត្ថុតាង ត្រូវបានឃាត់ខ្លួននៅបញ្ជាការដ្ឋានកងរាជអាវុធហត្ថខេត្តកែប ដើម្បីកសាងសំណុំរឿង អនុវត្តតាមនីតិវិធីច្បាប់ ៕
