ទឹកភ្លៀងធ្លាក់ជាបន្តបន្ទាប់ នៅរមណីយដ្ឋានទឹកធ្លាក់ក្បាលឆាយ បណ្តាលឲ្យរងការជន់លិច នៅព្រឹកនេះ
ខេត្តព្រះសីហនុ ៖ ប្រភពវីដេអូឃ្លីបពីប្រជាពលរដ្ឋ បានអោយដឹងជាបឋមថា ៖នៅព្រឹកថ្ងៃទី១៨ ខែកញ្ញា ឆ្នាំ២០២៤នេះ នៅរមណីយដ្ឋានធម្មជាតិទឹកធ្លាក់ក្បាលឆាយ ដែលមានទីតាំងស្ថិតនៅភភូមិទី១ សសង្កាត់លេខ១ ក្រុងព្រះសីហនុ ខេត្តព្រះសីហនុ កំពុងទទួលរងការជន់លិចយ៉ាងខ្លាំង ។
ការជន់លិចនេះ គឺដោយសារតែមានភ្លៀងធ្លាក់ជាបន្តបន្ទាប់ ធ្វើអោយប្រភពទឹកជាច្រើនមកពីជួរភ្នំផ្សេងៗបានហូរធ្លាក់យ៉ាងខ្លាំង នាព្រឹកថ្ងៃពុធនេះ ។
បើតាមអាជីវករអ្នកលក់ដូរ ក៏បានឲ្យដឹងដែរថា៖ ស្ថានភាពទឹកនៅរមណីដ្ឋានទឹកធ្លាក់ក្បាលឆាយ នៅថ្ងៃត្រង់ថ្ងៃទី១៨ ខែកញ្ញានេះ បានស្រកចុះហើយ ។ យ៉ាងណា អាជ្ញាធរ បានអំពាវនាវដល់ប្រជាពលរដ្ឋ និង ភ្ញៀវទេសចរដែលបានដើរលេងកម្សាន្ដនៅរមណីយដ្ឋាននេះ ត្រូវបង្កើនការប្រុងប្រយ័ត្នឲ្យបានខ្ពស់ពីសុវត្តិភាព ។
ដោយឡែក តាមការព្យាករណ៍របស់ក្រសួងធនធានទឹក និងឧតុនិយម នាថ្ងៃនេះ បានអោយដឹងថា៖ ទីក្រុងភ្នំពេញ និងខេត្តនានាស្ទើរទាំងអស់ នៃប្រទេសកម្ពុជា នឹងមានភ្លៀងធ្លាក់ខ្លាំង ចាប់ពីថ្ងៃទី១៨ ខែកញ្ញាដល់ថ្ងៃទី២០ ខែកញ្ញា ។
ក្រសួង បានអោយដឹងទៀតបន្តថា៖ ព្យុះទី១៤ «ពូលឡាសាន» បន្តធ្វើឲ្យកម្ពុជាមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ ព្យុះទី១៤ មានឈ្មោះពូលឡាសាន បានបន្តធ្វើកម្ពុជាមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ ចាប់ពីថ្ងៃទី១៨ ដល់២០ ខែកញ្ញា ឆ្នាំ២០២៤ ។ នៅតំបន់មាត់សមុទ្រមានខ្យល់បក់មកពីទិសនិរតី និងពាយ័ព្យមានល្បឿនមធ្យម៥ម៉ែត្រ/វិនាទី ។ ខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់ជាមួយផ្គរ រន្ទះ និងខ្យល់កន្ត្រាក់ គ្របដណ្តប់លើ ផ្ទៃដី៤០%។ រលកសមុទ្រមានកម្ពស់មធ្យមអប្បបរមា១,៥០ម៉ែត្រ និងកម្ពស់មធ្យមអតិបរមា ២,២៥ម៉ែត្រ ៕
