ប្រធានាធិបតីអេក្វាឌ័រ លោក ដានីញ៉ែល ណូបូអា (Daniel Noboa) បាននិយាយកាលពីថ្ងៃពុធ (១០ មករា) ថាប្រទេសរបស់លោក «កំពុងមានសង្រ្គាម» ជាមួយក្រុមឧក្រិដ្ឋជនគ្រឿងញៀន ដែលកំពុងចាប់ឆ្មាំពន្ធនាគារជាចំណាប់ខ្មាំង ស្របពេលមានការកើនឡើងយ៉ាងខ្លាំងនៃអំពើហិង្សា ដែលបានមើលឃើញខ្មាន់កាំភ្លើងសម្រុកចូលកាន់កាប់ការផ្សាយបន្តផ្ទាល់តាមទូរទស្សន៍ និងការផ្ទុះជាច្រើននៅក្នុងទីក្រុងនានា។
លោក ណូបូអា កាលពីថ្ងៃអង្គារ បានដាក់ឈ្មោះក្រុមជនអន្ធពាលចំនួន ២២ក្រុម នាក់ថា ជាអង្គការភេរវករ ដែលធ្វើឱ្យពួកគេក្លាយជាគោលដៅយោធាជាផ្លូវការ។ លោកប្រធានាធិបតីរូបនេះបានឡើងកាន់អំណាចកាលពីខែវិច្ឆិកា ដោយសន្យាថា នឹងដោះស្រាយបញ្ហាសន្តិសុខដែលកំពុងកើនឡើងដោយបណ្តាលមកពីកំណើននៃក្រុមជួញដូរគ្រឿងញៀនដែលដឹកជញ្ជូនកូកាអ៊ីនឆ្លងកាត់អេក្វាឌ័រ។
លោក ណូបូអា បានប្រាប់ស្ថានីយ៍វិទ្យុ ខាណេឡា (Canela) កាលពីថ្ងៃពុធថា «យើងកំពុងមានសង្រ្គាម ហើយយើងមិនអាចបោះបង់ចោល ឬចុះចាញ់នៅចំពោះមុខក្រុមភេរវករទាំងនេះទេ»។
លោកបានប៉ាន់ប្រមាណថា សមាជិកក្រុមឧក្រិដ្ឋជនប្រហែល ២០.០០០នាក់ កំពុងធ្វើសកម្មភាពនៅក្នុងប្រទេសអេក្វាឌ័រ។ ផ្លូវនានាក្នុងរដ្ឋធានី គីតូ (Quito) និងទីក្រុងកំពង់ផែ ក្វាយ៉ាគ្វីល (Guayaquil) មានភាពស្ងប់ស្ងាត់ជាងធម្មតាកាលពីថ្ងៃពុធ ដោយអាជីវកម្មជាច្រើនបានបិទទ្វារ ឬធ្វើការពីចម្ងាយ ហើយសាលារៀនជាច្រើនក៏ត្រូវបានបិទផងដែរ។
ការចាប់ឆ្មាំពន្ធនាគារ និងបុគ្គលិកជាង ១៣០នាក់ធ្វើជាចំណាប់ខ្មាំង ដែលបានចាប់ផ្តើមនៅព្រឹកព្រលឹមថ្ងៃចន្ទ ហើយការរត់គេចខ្លួនរបស់មេដឹកនាំក្រុមជនអន្ធពាល ឡូស ស្ហូណេរូស (Los Choneros) គឺលោក អាដូលហ្វូ ម៉ាស៊ីយ៉ាស (Adolfo Macias) ពីពន្ធនាគារកាលពីចុងសប្តាហ៍បានជំរុញឱ្យលោកប្រធានាធិបតី ណូបូអា ប្រកាសស្ថានភាពអាសន្នក្នុងប្រទេសរយៈពេល ៦០ថ្ងៃ៕
